BAKI,VOA,Yusif Şərifzadə

ABŞ və İran arasında razılaşmanın gələcəyi ilə bağlı diplomatik fəaliyyət rəsmi görüşlərdən daha çox pərdəarxası təmaslar üzərində qurulub.

VOA xəbər verir ki, İsveçrənin Xarici İşlər Nazirliyi müxtəlif ölkələrin diplomatlarının məxfi görüşlər keçirməsi üçün xüsusi məkan ayırıb.

Məlumata görə, İsveçrə tərəflərin ilkin razılaşmanı imzalamaq üçün seçdiyi əsas məkanlardan biri olub və bu səbəbdən diplomatik fəaliyyətin mərkəzində qalır.

Şahidlərin sözlərinə görə, ABŞ Prezidenti Donald Trampın kürəkəni Cared Kuşnerin də İsveçrədəki kurort kompleksində olduğu görülüb. ABŞ-nin xüsusi nümayəndəsi Stiv Uitkoffun da ölkəyə gəldiyi bildirilsə də, onun həmin məkanda olub-olmadığı təsdiqlənməyib.

Eyni zamanda Qətərin Baş naziri də kurortda görüşlər keçirir. Son 24 saat ərzində onun İsveçrənin xarici işlər naziri ilə görüş keçirdiyi bildirilir.

Məlumata görə, Pakistanın xarici işlər naziri də son aylarda razılaşma əldə olunması istiqamətində fəal rol oynayan dördtərəfli məsləhətləşmə qrupunun nümayəndələri ilə görüşüb. Həmin qrupa Türkiyə, Səudiyyə Ərəbistanı, Misir və Pakistan daxildir.

Bu arada Pakistanın daxili işlər naziri Möhsin Nəqvi Tehranda İranın xarici işlər naziri Abbas Əraqçi ilə danışıqlar aparır.

Müşahidəçilər qeyd edirlər ki, planlaşdırılan rəsmi görüşlərin təxirə salınmasına baxmayaraq, pərdəarxası diplomatik fəaliyyət sürətlə davam edir və tərəflər mümkün razılaşma üzərində intensiv işləyirlər.