BAKI,VOA,Yusif Şərifzadə

ABŞ Xəzinədarlıq naziri Skott Bessent Vaşinqton və Tehran arasında aparılan danışıqların davam etdiyini, lakin prosesin hələ tam nəticəyə yaxın olmadığını bildirib.

VOA xəbər verir ki, Ağ Evdə jurnalistlərin suallarını cavablandıran Skott Bessent ABŞ və İran arasında danışıqların “qarşılıqlı addımlar” formasında davam etdiyini qeyd edib.

Nazir proseslə bağlı detallara girməsə də, tərəflər arasında diplomatik təmasların davam etdiyini təsdiqləyib.

“Onlar bir-biri ilə gedib-gəlirlər,” — deyə Bessent bildirib.

ABŞ Xəzinədarlıq naziri əlavə edib ki, Prezident Donald Tramp İranla bağlı “pis bir razılaşmanı qəbul etməyəcək”.

Onun sözlərinə görə, Vaşinqton yalnız ABŞ maraqlarına uyğun və uzunmüddətli təhlükəsizlik təminatları verən razılaşmanı qəbul etməyə hazırdır.

Açıqlama ABŞ və İran arasında həm diplomatik danışıqların, həm də qarşılıqlı iqtisadi və siyasi təzyiqlərin davam etdiyi bir mərhələdə səsləndirilib.

Analitiklər hesab edirlər ki, Vaşinqton bir tərəfdən danışıqları davam etdirir, digər tərəfdən isə sanksiyalar və iqtisadi təzyiq vasitəsilə Tehranın mövqeyinə təsir göstərməyə çalışır.

Ekspertlərin fikrincə, Tramp administrasiyası mümkün razılaşmanı daxili siyasi auditoriya qarşısında “güclü və sərt diplomatiya” nümunəsi kimi təqdim etməyə çalışacaq.

Son həftələr ABŞ–İran münasibətlərində həm gərginlik, həm də diplomatik aktivliyin paralel şəkildə artdığı müşahidə olunur.