BAKI,AzerVoice, Fərid Mikayılov
Çinin xarici işlər naziri Van İ, İranda iqtisadi çətinliklər fonunda davam edən kütləvi etirazlar şəraitində Tehrana siyasi dəstək mesajı verib.
AzerVoice xəbər verir ki, Van İ, İranın xarici işlər naziri Abbas Əraqçi ilə telefon danışığı aparıb.
Danışıq zamanı Əraqçi Çini ölkəsindəki mövcud vəziyyətlə bağlı məlumatlandırıb.
Van İ bildirib ki, Pekin İran hökumətinin və xalqının birgə səylərlə çətinliklərin öhdəsindən gələcəyinə, milli sabitliyi qoruyacağına, həmçinin qanuni hüquq və maraqlarını müdafiə edəcəyinə inanır. O, eyni zamanda ABŞ-nin İrana mümkün müdaxiləsi ilə bağlı narahatlıqlara toxunaraq, Çinin beynəlxalq münasibətlərdə güc tətbiqinə, təhdid siyasətinə və bir dövlətin iradəsinin digərlərinə zorla qəbul etdirilməsinə qəti şəkildə qarşı olduğunu vurğulayıb.
Çin XİN rəhbəri bütün tərəfləri təmkinli davranmağa, sülhü prioritet saymağa və fikir ayrılıqlarını dialoq yolu ilə həll etməyə çağırıb. Van İ əlavə edib ki, Çin regional sabitliyin qorunması üçün konstruktiv rol oynamağa hazırdır.
Öz növbəsində İranın xarici işlər naziri Abbas Əraqçi ölkədəki etirazların xarici qüvvələrin təsiri ilə başladığını iddia edib, hazırda isə vəziyyətin nəzarət altına alındığını bildirib. O qeyd edib ki, İran mümkün xarici müdaxilələrə hazırdır, lakin diplomatik dialoqa açıq qalır. Əraqçi Çinin bölgədə sülh və sabitliyin təmin olunmasında daha fəal rol oynamasını dəstəklədiklərini də vurğulayıb.
Qeyd edək ki, İranda etirazlar 2025-ci il dekabrın 28-də milli valyutanın kəskin dəyər itirməsi və iqtisadi vəziyyətin ağırlaşması fonunda Tahranda başlayaraq qısa müddətdə ölkənin digər bölgələrinə yayılıb. Yanvarın 8-də paytaxtda vəziyyətin daha da gərginləşməsindən sonra hakimiyyət internetə çıxışı məhdudlaşdırıb.
Rəsmi Tehran indiyədək ölən və yaralananlarla bağlı dəqiq statistika açıqlamasa da, ABŞ mərkəzli HRANA hüquq-müdafiə təşkilatı etirazlar zamanı 2 min 615 nəfərin həlak olduğunu, 18 min 470 nəfərin isə saxlanıldığını bildirib.