BAKI, AzerVoice, Səməd Əyyubov

İspaniyanın baş naziri Pedro Sançes fələstinliləri dəstəkləyən nümayişçilərə heyranlığını ifadə edib. Halbuki onların İspaniya Veloturu marşrutu boyunca keçirdikləri aksiyalar son günlər bəzi idmançıların yarışdan çəkilməklə hədələməsinə səbəb olmuşdu.

AzerVoice-un məlumatına görə, yarışın son mərhələsinə hazırlıq çərçivəsində, paytaxt Madriddə başa çatacaq 21 günlük veloturun final günü minə yaxın polis əməkdaşı əraziyə cəlb olunub.

Etiraz aksiyaları İsrailin Qəzzadakı hərbi əməliyyatlarına qarşı təşkil olunub və “İsrael-Premier Tech” komandasını hədəfə alaraq yarışın bir neçə mərhələsini pozub. Veloturun bu gün başa çatması nəzərdə tutulurdu.

Sançes cənubdakı Malaqa şəhərində Sosialist Partiyasının toplantısında çıxış edərək bildirib: “Bu gün Vuelta turnirinin son mərhələsi keçirilir. Biz idmançılara hörmətimizi bildiririk, eyni zamanda ədalətli məsələlərlə, o cümlədən Fələstinlə məşğul olan İspaniya xalqına heyranlığımızı ifadə edirik.”

Madridin mərkəzində yüzlərlə nümayişçi İsrailin Qəzzadakı müharibəsinə etiraz olaraq yarışın final marşrutuna daxil olduqdan sonra velotur dayandırılıb. Polis onları dağıtmaq üçün gözyaşardıcı qazdan istifadə edib. Etirazçılar Qran Via küçəsi də daxil olmaqla paytaxtın əsas yollarında qurulmuş baryerləri söküblər və İsrailin boykot edilməsinə çağıran şüarlar səsləndiriblər. Bu səbəbdən velosipedçilər yarışa davam edə bilməyiblər.

Bundan əvvəl, şənbə günü də etirazçılar Madriddə keçirilən yarışı pozmağa cəhd etmiş, təhlükəsizlik baryerlərini aşaraq yolu bağlamağa çalışmışdılar. Yarışçılar onların yanından keçərək marşruta davam etmişdilər.

Xatırladaq ki, İspaniya ötən ilin may ayında Fələstin dövlətini rəsmən tanıyıb və Qəzzada İsrailin hərbi əməliyyatlarını ən çox tənqid edən ölkələrdən biri olub. Sançes hökuməti bu ayın əvvəlində İsrailə hərbi təchizatla bağlı yeni məhdudiyyətlər də elan edib.