BAKI,AzerVoice, Fərid Mikayılov

ABŞ prezidenti Donald Trampın Oval Ofisdə Avropa liderləri ilə görüş zamanı çəkilən fotolar sosial mediada geniş müzakirələrə səbəb olub.

AzerVoice xəbər verir ki, Tramp, Alyaskada Rusiya prezidenti Vladimir Putinlə danışıqlarından sonra Vaşinqtonda Ukrayna prezidenti Volodimir Zelenski və Avropa liderlərini qəbul edib.

Görüşdə Böyük Britaniyanın baş naziri Kir Starmer, Fransa prezidenti Emmanuel Makron, Almaniya kansleri Fridrix Merts, İtaliya baş naziri Giorgia Meloni, Finlandiya prezidenti Aleksander Stub, NATO baş katibi Mark Rutte və Avropa Komissiyasının rəhbəri Ursula von der Leyen iştirak edib.

Müzakirələrdə əsas mövzular Rusiyanın Ukraynaya qarşı müharibəsinin dayandırılması və Kiyevə təhlükəsizlik təminatlarının verilməsi olub.

Görüşdən yayılan fotolarda Avropa liderlərinin Oval Ofisdə Trampın qarşısında sıra ilə əyləşməsi diqqət çəkib. İzləyicilər bu görüntünü ABŞ prezidentinin “patron mənəm” mesajı verdiyi an kimi dəyərləndirib. Paylaşımlar minlərlə şərh toplayaraq sosial mediada gündəmə çevrilib.

Fotolarda diqqət çəkən digər məqam isə Rusiya–Ukrayna sərhədlərini göstərən xəritə olub. Şərhçilər bu detalı, tarixi olaraq kağız üzərində sərhədlərin müəyyənləşdirilməsi və dəyişdirilməsi praktikasının yenidən gündəmə gətirilməsi kimi qiymətləndirib.