BAKI, AzerVoice

Böyük Britaniya İsrailin ifrat sağçı nazirləri Bezalel Smotriç və İtamar Ben-Qvirin Qəzza ilə bağlı bəyanatlarına görə onlara qarşı sanksiyalar tətbiq edib.

AzerVoice xəbər verir ki, Böyük Britaniyanın bu qərarı çərçivəsində hər iki nazirin ölkəyə girişinə qadağa qoyulub, Böyük Britaniyadakı aktivləri dondurulub və onlarla maliyyə əlaqələri qadağan olunub.

Sanksiyalar iyunun 10-da qüvvəyə minib və bu qərar ölkəni Kanada, Avstraliya və Yeni Zelandiyadan sonra oxşar addım atan dördüncü ölkə edib.

Qeyd edək ki, Smotriç Qəzzaya humanitar yardımın qarşısının alınmasını və bölgənin tamamilə məhv edilməsini dəstəkləyən fikirləri ilə tənqid olunub. Ben-Qvir isə Qüdsdə Məscidül-Əqsa əvəzinə sinaqoq tikilməsi və fələstinlilərin Qəzzadan deportasiyasını müdafiə edib.

Böyük Britaniyanın xarici işlər naziri David Lammy hər iki nazirin açıqlamalarını “dəhşətli və təhlükəli” adlandırıb. Bu qərar, Baş nazir Keir Starmerin beynəlxalq hüququn pozulması ilə bağlı İsraili xəbərdar etməsindən sonra verilib.

Qeyd edək ki, BMT-nin hesabatlarına əsasən, Qəzzada 2,1 milyon insan aclıq riski ilə üz-üzədir. Yardımların çatdırılması zamanı baş verən hadisələr nəticəsində indiyədək yüzdən çox insan həlak olub. Son olaraq, yardıma gələn 17 nəfərin də İsrail əsgərləri tərəfindən öldürüldüyü bildirilir.