BAKI, AzerVoice

Çin hökuməti, COVID-19 pandemiyasından sonra ölkəyə xarici turist axınını artırmaq məqsədilə tətbiq etdiyi birtərəfli viza azadlığı proqramına beş Latın Amerikası ölkəsini əlavə edəcəyini açıqlayıb.

AzerVoice xəbər verir ki, Çin Xarici İşlər Nazirliyinin sözçüsü Lin Cien-in verdiyi məlumata görə, Braziliya, Argentina, Çili, Peru və Uruqvay vətəndaşları 12 iyun 2025-ci ildən 31 may 2026-cı ilədək Çinə 30 günədək vizasız səfər edə biləcəklər. Bu viza azadlığı yalnız işgüzar, turizm, ailə ziyarəti və tranzit məqsədli səfərləri əhatə edəcək.

Bu qərarla birlikdə Çin tərəfindən birtərəfli viza azadlığı təqdim olunan ölkələrin sayı 43-ə çatıb. Yeni addım, 13 may 2025-ci ildə Pekində keçirilmiş Çin–Latın Amerikası və Karib Ölkələri Birliyi (CELAC) Forumunun IV Nazirlər Konfransından sonra atılıb.

Pekin rəhbərliyi, pandemiya ilə kəsintiyə uğramış beynəlxalq səyahətləri canlandırmaq üçün müxtəlif ölkələrlə viza azadlığı təşəbbüsləri həyata keçirir. 1 dekabr 2023-dən etibarən Fransa, Almaniya, Niderland, İtaliya, İspaniya və Malayziya vətəndaşlarına 15 gün müddətinə birtərəfli viza azadlığı tətbiq olunub. 2024-cü ilin yanvarında isə Sinqapurla 30 günlük, Tailandla isə müddətsiz qarşılıqlı viza azadlığı sazişi imzalanıb.

Mart və noyabr aylarında İsveçrə, İrlandiya, Macarıstan, Avstriya, Belçika, Lüksemburq, Bolqarıstan, Rumıniya, Xorvatiya, Monteneqro, Şimali Makedoniya, Malta, Estoniya, Latviya və Yaponiya da viza azadlığı proqramına daxil edilib.

Bundan əlavə, Çin 54 ölkənin vətəndaşlarına tranzit zamanı ölkədə vizasız qalma müddətini 10 günə qədər uzadıb. Hazırda Çin 18 ölkənin adi pasport sahibləri ilə qarşılıqlı viza azadlığı tətbiq edir. Türkiyə də daxil olmaqla bir çox ölkənin diplomatik, xidməti və xüsusi pasport sahibləri üçün qarşılıqlı viza azadlığı mövcuddur.