BAKI,VOA, Fərid Mikayılov

İraqın Baş naziri Məhəmməd Şiə Əl-Sudani Bağdadda kəşfiyyat qərargahına edilən dron hücumunu pisləyərək bunu “qorxaq silahlı qrupun terror aktı” adlandırıb.

VOA xəbər verir ki, hücum nəticəsində bir zabit həlak olub, bir neçə kəşfiyyat əməkdaşı isə yaralanıb.

Sudani bildirib ki, bu hadisə hökumətlə silahlı qruplar arasında dialoq imkanlarını faktiki olaraq aradan qaldırır. Onun sözlərinə görə, bəzi qruplar ABŞ-ın İraqdakı maraqlarına qarşı hücumları İranla həmrəylik adı altında davam etdirir.

Baş nazir siyasi qüvvələri dövlət institutlarına qarşı hücumlara münasibətdə “aydın və açıq mövqe” nümayiş etdirməyə çağırıb. Bu çağırış xüsusilə İrana yaxın şiə siyasi bloklarının bəzi üzvlərinə ünvanlanıb.

Məlumata görə, silahlı qruplar Bağdaddakı ABŞ səfirliyini, hava limanındakı diplomatik logistika bazasını və Ərbil şəhərindəki ABŞ konsulluğunu hədəf almaqda davam edir.

Sudani bazar günü hücumun baş verdiyi kəşfiyyat qərargahına baş çəkərək aidiyyəti qurumlara hadisənin hərtərəfli araşdırılması və günahkarların məsuliyyətə cəlb edilməsi barədə göstəriş verib.

“Bu əməli törədənlər İraqı təmsil etmir. Bu cinayət üçün heç bir əsas yoxdur” - deyə o bildirib.

Baş nazir vurğulayıb ki, hökumət məsuliyyətli davranır, lakin ölkənin ali maraqlarına zidd addımlara laqeyd qalmayacaq.