BAKI,VOA, Fərid Mikayılov

2030-cu ildə keçiriləcək futbol üzrə dünya çempionatı tarixdə ilk dəfə altı ölkənin ev sahibliyi ilə təşkil olunacaq. Turnirin əsas ev sahibləri İspaniya, Portuqaliya və Mərakeş olacaq, Argentina, Uruqvay və Paraqvay isə yubiley çərçivəsində ilk üç oyuna ev sahibliyi edəcək.

VOA xəbər verir ki, turnirin iyunun 8-dən iyulun 21-dək keçirilməsi planlaşdırılır. Açılış xarakterli ilk üç qarşılaşma Argentina, Uruqvay və Paraqvayda baş tutacaq. Bundan sonra yarış iyunun 13-dən etibarən əsas ev sahibi ölkələr olan İspaniya, Portuqaliya və Mərakeşdə davam edəcək.

İlk oyunların Cənubi Amerikada keçirilməsi 1930-cu ildə Uruqvayda təşkil olunan ilk dünya çempionatının 100 illiyinə həsr olunub. Yubiley matçının məhz Uruqvayda keçirilməsi nəzərdə tutulur.

Hazırkı plana əsasən, turnirdə 48 milli komanda iştirak edəcək və ümumilikdə 104 oyun keçiriləcək. FIFA iştirakçı sayının 64 komandaya çatdırılması imkanını da müzakirə edir.

Finalın keçiriləcəyi stadion hələ rəsmən müəyyən edilməyib. Əsas namizəd Madrid şəhərində yerləşən və yenidən qurulan "Santyaqo Bernabeu" stadionudur. Barselonadakı "Kamp Nou" və Mərakeşin Mərakeş şəhərində tikilən "II Həsən" stadionu da mümkün variantlar sırasında göstərilir.