BAKI,VOA,Yusif Şərifzadə

ABŞ-da İsrail tərəfdarı lobbi təşkilatı olan AIPAC-ın siyasi fəaliyyət komitəsi (PAC) əvvəllər dəstəklədiyi, lakin İsrailə ABŞ hərbi yardımının dayandırılmasını nəzərdə tutan düzəlişin lehinə səs vermiş Demokratlar Partiyasından olan konqres üzvləri üçün onlayn ianə imkanını ləğv edib.

VOA xəbər verir ki, ABŞ mediasının məlumatına görə, bu qərar ondan çox demokrat qanunvericiyə şamil olunub. Onların arasında Nümayəndələr Palatasında Demokratlar Partiyasının ikinci ən yüksək vəzifəli nümayəndəsi Ketrin Klark da var.

Qərar Nümayəndələr Palatasında İsrailə ayrılan 3,3 milyard dollarlıq hərbi yardımın dayandırılmasını nəzərdə tutan düzəlişin səsverməsindən sonra qəbul edilib. Həmin təşəbbüs qəbul edilməsə də, 103 demokrat və bir respublikaçı onun lehinə səs verib ki, bu da Demokratlar Partiyası daxilində İsrail siyasəti ilə bağlı fikir ayrılıqlarının dərinləşdiyini göstərib.

AIPAC-ın sözçüsü Dərin Sousa Politico nəşrinə açıqlamasında bildirib ki, təşkilat İsraili dəstəkləyən mövqedən çıxış edən qanunvericiləri yüksək qiymətləndirir və əks mövqe sərgiləyənlərdən məyusdur.

"AIPAC üzvləri prinsipial mövqe nümayiş etdirən nümayəndələrə dərin minnətdarlıq duyurlar və bunu etməyənlərdən məyusdurlar."

Məlumata görə, adıçəkilən demokratlar AIPAC-ın dəstəklədiyi namizədlər siyahısında qalırlar. Lakin təşkilatın ianə portalında onların adına birbaşa maliyyə dəstəyi göndərmək imkanı artıq deaktiv edilib.