BAKI,VOA,Yusif Şərifzadə

ABŞ Prezidenti Donald Trampın administrasiyası xarici yardım siyasətində yeni prioritetlər çərçivəsində Avropa və digər regionlarda MAGA (Make America Great Again) ideyalarına yaxın təşəbbüslərin maliyyələşdirilməsini nəzərdə tutan qrant proqramını elan etməyə hazırlaşır. Bu barədə Financial Times qəzeti məlumat yayıb.

VOA xəbər verir ki, qəzetin əldə etdiyi və ABŞ Dövlət Departamentinin Konqres üzvlərinə göndərdiyi bildirilən sənədə əsasən, təklif olunan proqramlardan biri Avropa İttifaqının Rəqəmsal Xidmətlər Aktı (Digital Services Act) və Rəqəmsal Bazarlar Aktı (Digital Markets Act) çərçivəsində tətbiq olunan məzmun tənzimləmələrinin yaratdığı iddia edilən senzura ilə mübarizə məqsədilə 2 milyon dollar ayrılmasını nəzərdə tutur. Məlumatda bildirilir ki, Reuters həmin sənədi müstəqil şəkildə təsdiqləyə bilməyib.

Məlumata görə, proqram ABŞ administrasiyasının xarici yardım siyasətinin yenidən formalaşdırılması strategiyasının bir hissəsidir. Plan çərçivəsində söz azadlığı, milli suverenlik və Tramp administrasiyasının prioritet hesab etdiyi digər mövzular üzrə fəaliyyət göstərən təşkilatların dəstəklənməsi nəzərdə tutulur.

Financial Times yazır ki, təklif olunan digər qrantlar Avropada "Qərb sivilizasiyası dəyərləri" istiqamətində əməkdaşlığın genişləndirilməsi, Şərqi Avropa və Balkanlarda müxtəlif təşəbbüslərin dəstəklənməsi, həmçinin digər regionlarda insan hüquqları və söz azadlığı layihələrinin maliyyələşdirilməsini də əhatə edir.

Qəzetin məlumatına görə, proqram hələ yekun təsdiq mərhələsindədir və bəzi təşəbbüslərlə bağlı Dövlət Departamenti daxilində fikir ayrılıqları mövcuddur. Administrasiya isə bu dəyişiklikləri ABŞ-ın xarici yardım siyasətinin yeni prioritetlərinə uyğunlaşdırmaq məqsədi daşıdığını bildirir.