BAKI, AzerVoice, Səməd Əyyubov – Qəzza zolağına havadan atılan yardımlar, yerindən didərgin düşən insanların sığındığı çadırların üzərinə düşərək ölüm hallarına səbəb olur.
AzerVoice xəbər verir ki, bu barədə Qəzzadakı Daxili İşlər Nazirliyinin yaydığı bəyanatda bildirilib.
Bəyanatda qeyd olunub ki, İsrail havadan yardım endirmə üsulunu “qarışıqlıq yaratmaq vasitəsi” kimi istifadə edir.
Bəyanatda vurğulanıb ki, İsrail bu üsulu aclıq siyasətinin bir hissəsi kimi tətbiq edir və bununla bölgədə qarışıqlıq yaratmağa, eləcə də quldur dəstələrinin yayılmasına şərait formalaşdırmağa çalışır.
“Havadan atılan yardımlara doğru qaçan insanlar arasında yaranan izdiham ölüm hallarına gətirib çıxarır. Bəzi yardımlar birbaşa evlərin və çadırların üzərinə düşərək qadın və uşaqların həlak olmasına səbəb olub. Bu cür ölüm ən son bu gün baş verib” – deyə, bəyanatda qeyd olunub.
Bildirilib ki, İsrailin hücumları və mühasirəsi nəticəsində aclığın hökm sürdüyü Qəzza zolağına havadan atılan yardımlar minimum ehtiyacları belə ödəyə bilmir. Bu yardım həcmi, quru yolu ilə sərhəd qapılarından gətirilən yardımla müqayisə oluna bilməyəcək qədər azdır.
“Paraşütlə atılan yardımların mənfi təsirləri, yaratdığı qarışıqlıq və ölüm halları aclıq çəkən xalqımıza faydadan çox zərər verir” - deyə bəyanatda vurğulanıb. Nazirlik sərhəd qapılarının açılması və aclıq fəlakətinin qarşısının alınmasına çağırıb.
Bundan əlavə, havadan yardım əməliyyatlarında iştirak edən ölkələrə bu təcrübəni yenidən nəzərdən keçirmələri tövsiyə olunub.
Qeyd edək, İsrail ordusu yanvar ayında qüvvəyə minmiş atəşkəsdən sonra martın 18-də Qəzza zolağına qarşı hərbi əməliyatlara yenidən başlayıb.
İsrailin 2023‑cü il oktyabrın 7-dən bəri Qəzzaya endirdiyi zərbələr nəticəsində azı 61 min 158 fələstinli həlak olub, 151 min 442 nəfər yaralanıb.
İsrailin mart ayında atəşkəsi pozduqdan sonra həyata keçirdiyi hücumlarda isə 9 min 654 nəfər öldürülüb, 39 min 401 nəfər yaralanıb.
Mayın 27-dən bəri isə İsrail və ABŞ-ın təşkilatçılığı ilə “Qəzza Humanitar Yardım Fondu” adı altında yaradılan paylama məntəqələrində fələstinlilərə qarşı həyata keçirilən hücumlar nəticəsində ölənlərin sayı 1 655-ə, yaralıların sayı isə 11 min 800-ə çatıb.