Nigerin paytaxtı Niameydə üsyançıların hərbi bazaya və strateji obyektlərə hücumundan sonra vəziyyət nəzarətə götürülüb. Niger ordusu əsas hava bazasında nəzarəti bərpa edib, şəhərdə isə sakitlik yaranıb.
Hücum zamanı hərbçilərin bəzi əsgərləri saxlamğa çalışdığı, daha sonra isə paytaxtdakı strateji mövqelərə atəş açıldığı bildirilir. Təhlükəsizlik qüvvələrinin müdaxiləsindən sonra üsyançıların hücumu dəf edilib və barrikadalar aradan qaldırılıb.
Hadisələrin fonunda Əlcəzair Nigerə hərbi dəstək göndərib. Əlcəzair Müdafiə Nazirliyi Niameyə 4 ədəd “Su-30” qırıcı təyyarəsinin göndərildiyini açıqlayıb. Bildirilib ki, bu addım Niger ordusuna dəstək vermək və ölkədə sabitliyi qorumaq məqsədi daşıyır.
Əlcəzair hakimiyyəti hadisələri ciddi narahatlıqla izlədiyini bildirərək Niger rəhbərliyinə tam həmrəyliyini və dəstəyini ifadə edib. Niger 2023-cü ilin iyulunda prezident Məhəmməd Bazumun hərbi çevrilişlə devrilməsindən sonra hərbi hakimiyyət tərəfindən idarə olunur.