BAKI,VOA,Yusif Şərifzadə

İranın cənubunda yerləşən Bəndər Abbas şəhəri və Qeşm adası ətrafında yeni partlayış səslərinin eşidildiyi bildirilib. Hadisə bölgədə ABŞ ilə İran arasında artan gərginlik fonunda baş verib.

VOA xəbər verir ki, İranın Mehr xəbər agentliyinin məlumatına görə, Bəndər Abbas və Qeşm adası ətrafında bir neçə güclü partlayış səsi qeydə alınıb. İlkin məlumata əsasən, hadisə nəticəsində mülki əhali arasında ölən və ya yaralanan olmayıb, yaşayış və kommersiya obyektlərinə ziyan dəyməsi barədə də məlumat verilməyib.

Mehr agentliyi bildirib ki, son günlər ərzində ABŞ qüvvələri İranın cənub sahillərinə hücumlar həyata keçirib. Agentliyin yaydığı məlumatda bu hücumlar nəticəsində bir sıra balıqçıların və ölkənin müdafiə qüvvələrinin həlak olduğu iddia edilib.

İranın cənub sahilləri, xüsusilə Bəndər Abbas bölgəsi strateji əhəmiyyət daşıyır. Bu ərazi Hörmüz boğazına yaxın yerləşdiyi üçün regional təhlükəsizlik baxımından mühüm mövqeyə malikdir.

Hadisə ilə bağlı əlavə rəsmi məlumatlar açıqlanmayıb. Bölgədə baş verən hadisələr ABŞ-İran münasibətlərində gərginliyin davam etdiyini göstərən yeni amil kimi qiymətləndirilir.

Ekspertlər hesab edirlər ki, Hörmüz boğazı ətrafında yaranan hərbi risklər enerji daşımaları və beynəlxalq ticarət marşrutları üçün əlavə təhlükələr yarada bilər.