BAKI,VOA, Fərid Mikayılov

İran hazırkı mərhələdə ABŞ ilə danışıqlarda əsas diqqətin nüvə proqramına deyil, müharibənin dayandırılmasına yönəldiyini açıqlayıb.

VOA xəbər verir ki, İsmayıl Bəqai bildirib ki, hazırkı diplomatik prosesin əsas məqsədi bütün istiqamətlər üzrə qarşıdurmanın dayandırılması, o cümlədən regional gərginliyin azaldılması və strateji məsələlərin həllinə nail olmaqdır.

Bəqai qeyd edib ki, İran daha əvvəl də oxşar danışıqlar proseslərində iştirak edib, lakin qarşı tərəfin həddindən artıq tələbləri səbəbindən nəticələr əldə olunmayıb.

O həmçinin vurğulayıb ki, İran üçün ilk mərhələdə ölkənin maraqlarını və təhlükəsizlik narahatlıqlarını təmin edən şərtlər daxilində müharibənin başa çatdırılması vacibdir. Bundan sonra digər məsələlərin müzakirə edilə biləcəyi qeyd olunub.

İran rəsmisi ölkəsinin nüvə proqramı ilə bağlı mövqeyinin dəyişmədiyini bildirib və İranın dinc məqsədli nüvə enerjisindən istifadə hüququna malik olduğunu vurğulayıb.

Bununla yanaşı, sözçü İran və ABŞ arasında fikir ayrılıqlarının hələ də ciddi olaraq qaldığını qeyd edib və yaxın zamanda razılaşmanın əldə olunacağı ilə bağlı gözləntilərin real olmadığını bildirib.