BAKI,VOA, Nailə Babazadə

İran Xarici İşlər Nazirliyi İslamabadda keçirilməsi planlaşdırılan danışıqlar prosesi həmçinin ölkəyə tətbiq edilən dəniz blokadası və Vaşinqtonun son diplomatik addımları barədə rəsmi bəyanat yayıb. Nazirliyin bəyanatında Tehranın hazırkı mövqeyini əks etdirən bir neçə fundamental məqam xüsusi yer alıb.

VOA xəbər verir ki, rəsmi Tehran Pakistan danışıqlarında iştirak məsələsinə toxunaraq bildirib ki bu barədə hələlik yekun qərar verilməyib. Nazirlik mövqe tam müəyyənləşdikdən sonra ictimaiyyətə aydın məlumat veriləcəyini vurğulayıb və hazırda mediada çox sayda yalan xəbərlərin dolaşdığını qeyd edib.

Bəyanatda həmçinin diplomatik prosesin nəticəyə fokuslanmasının vacibliyi diqqətə çatdırılıb. İran rəsmiləri Vaşinqtonun diplomatiya iddialarının onların hərbi və siyasi hərəkətləri ilə üst-üstə düşmədiyini iddia ediblər. Xüsusilə İran limanlarına tətbiq edilən dəniz mühasirəsi beynəlxalq hüququn kobud pozuntusu kimi xarakterizə olunub.

İran tərəfi müharibənin qarşı tərəf tərəfindən başladıldığını və onların öz öhdəliklərini pozduğunu xatırladaraq rəsmi Tehranın hər zaman beynəlxalq razılaşmalara sadiq qaldığını iddia edib. Nazirliyin bu çıxışı dəniz blokadasının iqtisadi təzyiqləri artırdığı bir vaxtda Tehranın danışıqlar masasına oturmazdan əvvəl öz şərtlərini ifadə etmək cəhdi kimi dəyərləndirilir.