BAKI,VOA,Yusif Şərifzadə

ABŞ-ın aparıcı investisiya şirkətlərindən biri olan Blackstone süni intellekt infrastrukturunun genişləndirilməsi ilə bağlı cəmiyyətin narahatlıqlarını aradan qaldırmaq üçün müxtəlif tədbirlər həyata keçirdiyini açıqlayıb.

VOA xəbər verir ki, Blackstone şirkətinin baş icraçı direktoru Stiven Şvartsman bildirib ki, şirkət məlumat emalı mərkəzlərinin (data mərkəzləri) tikintisinin sosial və ekoloji təsirlərini azaltmaq məqsədilə portfelindəki şirkətlərlə sıx əməkdaşlıq edir.

Son illərdə Blackstone və digər iri özəl investisiya fondları süni intellekt sistemlərinin işləməsi üçün tələb olunan yüksək hesablama gücünü təmin edən məlumat emalı mərkəzlərinə və əlaqəli infrastruktura on milyardlarla dollar investisiya yatırırlar.

Lakin ABŞ-da bu cür obyektlərin sürətlə inşa olunması yerli icmalar arasında narahatlıq doğurur. İyun ayında Reuters/Ipsos tərəfindən keçirilmiş sorğuya əsasən, respondentlərin cəmi 14 faizi yaşadığı ərazidə texnologiya şirkətləri üçün yeni məlumat emalı mərkəzinin tikilməsini dəstəkləyəcəyini bildirib.

Şvartsmanın sözlərinə görə, Blackstone məlumat emalı mərkəzləri sahəsində fəaliyyət göstərən şirkətlərlə birlikdə həm yeni iş yerlərinin yaradılması, həm peşə hazırlığı proqramlarının genişləndirilməsi, həm də ətraf mühitə təsirin azaldılması istiqamətində layihələr həyata keçirir.

Bu tədbirlər çərçivəsində həmkarlar ittifaqları vasitəsilə məşğulluğun artırılması, işçi qüvvəsinin hazırlanması, su istifadə etməyən soyutma sistemlərinin tətbiqi, elektrik enerjisi istehsalının genişləndirilməsi və yerli iqtisadiyyata əlavə investisiyalar nəzərdə tutulur.

Şirkət hesab edir ki, bu yanaşma süni intellekt texnologiyalarının inkişafı ilə bağlı yaranan sosial, ekoloji və iqtisadi narahatlıqların azaldılmasına kömək edə bilər.