BAKI,VOA
ABŞ Prezidenti Donald Tramp bu gün Ağ Evdə Yaponiyanın Baş naziri Sanai Takaiçi ilə keçirdiyi birgə mətbuat konfransında İranla müharibənin gedişatı və Vaşinqtonun gələcək addımları barədə strateji açıqlamalar verib. Prezident ABŞ-ın İrana quru qoşunları yeritməyəcəyini və İsrailin neft infrastrukturunu hədəf almayacağını bəyan edib.
Tramp jurnalistlərin suallarını cavablandırarkən bir neçə mühüm məqamı diqqətə çatdırıb.
Prezident bildirib ki, İsrailin Baş naziri Benyamin Netanyahu ilə söhbətində onu İranın neft yataqlarına hücum etməkdən çəkinməyə çağırıb. Trampın sözlərinə görə, Netanyahu gələcəkdə İranın enerji obyektlərinə qarşı hər hansı hücum həyata keçirməyəcəyinə razılıq verib. Eyni zamanda, Tramp ABŞ-ın İranda hava və dəniz üstünlüyünün tam olduğunu, Amerika qüvvələrinin bölgədə "maneəsiz və sərbəst hərəkət" etdiyini vurğulayıb.
Donald Tramp qeyd edib ki, Ali rəhbər Əli Xamenei, Milli Təhlükəsizlik Şurasının katibi Əli Laricani, "Bəsic" komandanı Qulam Rza Süleymani və kəşfiyyat naziri İsmayıl Xatib kimi yüksək rütbəli rəsmilərin öldürülməsindən sonra İran hazırda yeni rəhbərlik axtarışındadır. Prezident həmçinin İslam İnqilabı Keşikçiləri Korpusunun (SEPAH) sıralarında parçalanmaların başladığını iddia edib.
"Biz dünyanın ən böyük ordusuna və texnikasına sahibik. Müharibəni iki saniyədə bitirə bilərik, lakin biz müdrikliklə və hesablanmış addımlarla hərəkət edirik," – deyə o əlavə edib. Prezidentin iddiasına görə, müharibənin ilk iki həftəsində İranın raket və PUA hücumları 90% azalıb.
Strateji hədəflər və maliyyə
Tramp qeyd edib ki, ötən gecə İran müəyyən bir bölgəyə 114 raket atsa da, Amerika texnikası sayəsində onların hamısı vurulub. O, həmçinin İranın əsas neft ixrac məntəqəsi olan Xark adasını məhv etmək iqtidarında olduqlarını xatırladıb. Pentaqonun müharibə xərcləri üçün 200 milyard dollar tələb etməsi barədə xəbərlərə toxunan Tramp, müxtəlif səbəblərdən daha çox maliyyəyə ehtiyac olduğunu təsdiqləyib.
Sonda Yaponiya ilə münasibətlərə toxunan Tramp, Tokionun hərbi texnika alışı və öhdəlikləri yerinə yetirmə baxımından NATO ölkələrindən daha yaxşı səviyyədə olduğunu bildirib.