BAKI,VOA,Yusif Şərifzadə
Tehrandakı Tətbiqi Elmlər Universitetinin professoru Mustafa Xoşçeşm ABŞ-nin İrana qarşı iqtisadi təzyiq siyasətinin gözlənilən nəticəni verməyəcəyini bildirib. Onun fikrincə, İran uzun illər davam edən məhdudiyyətlərə uyğunlaşaraq mühüm məhsulların idxalı və maliyyə imkanlarına çıxış üçün alternativ yollar formalaşdırıb.
VOA xəbər verir ki, Mustafa Xoşçeşm ABŞ-nin uzun illərdir İrana tətbiq etdiyi iqtisadi məhdudiyyətlərin Tehranın siyasətini dəyişdirmək məqsədinə çatmadığını bildirib. O, bu il baş verən iki hərbi qarşıdurmanı da Vaşinqtonun uzunmüddətli iqtisadi təzyiq siyasətinin İranı geri çəkilməyə məcbur etmədiyinin göstəricisi kimi qiymətləndirib.
Xoşçeşmin sözlərinə görə, İran iqtisadi məhdudiyyətlərin təsirini azaltmaq üçün başqa ticarət yollarından istifadə edə bilib. Buraya qonşu ölkələrlə ticarətin genişləndirilməsi, mühüm məhsulların alternativ kanallarla idxalı və maliyyə imkanlarına çıxışın qorunması daxildir.
İran uzun illərdir ABŞ-nin geniş iqtisadi məhdudiyyətləri ilə üzləşir. Bununla belə, Tehran neft satışı və xarici ticarətin davam etdirilməsi üçün müxtəlif vasitələrdən istifadə edib. Hazırda ABŞ rəhbərliyi İranla iqtisadi əlaqələri davam etdirən üçüncü ölkələrə qarşı da əlavə tədbirlər görməklə təzyiqi artırmağa çalışır.
Xoşçeşm ABŞ Prezidenti Donald Trampın hazırda hərbi addımlardan daha çox iqtisadi təzyiqdən danışmasının dünya bazarlarını sabitləşdirmək və neft qiymətlərinin yüksəlməsinin qarşısını almaq məqsədi daşıdığını iddia edib.
Professor bununla yanaşı, Tramp administrasiyasının iqtisadi təzyiqlə kifayətlənməyəcəyini düşünür. Onun fikrincə, ABŞ payız aylarında İsraillə birlikdə yenidən hərbi əməliyyatlara əl ata bilər. Bu, Xoşçeşmin proqnozudur və hazırda ABŞ-nin belə bir qərar qəbul etdiyini təsdiqləyən rəsmi məlumat yoxdur.
Tramp administrasiyası isə hazırda İrana və Tehranla iqtisadi əlaqələri davam etdirən tərəflərə qarşı təzyiqin genişləndiriləcəyini bildirir. Tramp avqustun 20-də İranı iqtisadi cəhətdən təcrid etmək üçün daha sərt tədbirlər vəd etsə də, yeni tədbirlərin bütün təfərrüatları hələ açıqlanmayıb.