BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan Türk Qızıl Aypara Cəmiyyətinin Mükafatlandırma Mərasimində çıxışı zamanı ölkədə səhiyyə sahəsində həyata keçirilən yeni strateji layihələr barədə məlumat verib. O bildirib ki, İstanbulun Silivri rayonunda inşası davam edən zavodun fəaliyyətə başlaması ilə hazırda xaricdən idxal olunan qan torbaları yerli istehsalla əvəz olunacaq.
Prezidentin sözlərinə görə, müəssisə tam gücü ilə fəaliyyətə başladıqdan sonra ildə təxminən 3 milyon qan torbası Türkiyədə istehsal ediləcək. Bu isə ölkənin hər il təxminən 1 milyard lirə həcmində idxal xərclərindən xilas olmasına imkan verəcək.
Beştəpə Millət Konqres və Mədəniyyət Mərkəzində keçirilən mərasimdə çıxış edən Ərdoğan Türk Qızıl Aypara Cəmiyyətinin 158 illik fəaliyyət tarixindən danışaraq təşkilatın həm ölkə daxilində, həm də beynəlxalq humanitar əməliyyatlarda mühüm rol oynadığını vurğulayıb.
O qeyd edib ki, təşkilat ötən il 3 milyondan çox vahid qan toplanması ilə yeni rekord müəyyənləşdirib və səhiyyə sektorunda yerli istehsal imkanlarının genişləndirilməsi istiqamətində mühüm layihələr həyata keçirir.
Prezident həmçinin Ankaranın Çubuk rayonunda təməli qoyulan “ProTürk” zavodu haqqında da məlumat verib. Bildirilib ki, 130 min kvadratmetr ərazidə inşa olunan müəssisədə qan plazmasından əldə edilən həyati əhəmiyyətli dərman preparatları istehsal olunacaq. Bu preparatların xərçəng, ağır travmalar, yanıq xəsarətləri, immun sistem xəstəlikləri və hemofiliyanın müalicəsində istifadə ediləcəyi qeyd olunub.
Ərdoğan vurğulayıb ki, layihənin həyata keçirilməsi nəticəsində Türkiyə qan plazmasından kritik dərman preparatları istehsal edən ölkələr sırasına qoşulacaq və bu sahədə xarici asılılıq əhəmiyyətli dərəcədə azalacaq.
Türkiyə Prezidenti çıxışında beynəlxalq humanitar fəaliyyətlərə də toxunaraq, Türk Qızıl Aypara Cəmiyyətinin Qəzzada həyata keçirdiyi yardım missiyalarını yüksək qiymətləndirib. Onun sözlərinə görə, təşkilat indiyədək Qəzzaya 26 min tondan artıq humanitar yardım göndərib, 15 milyon porsiyadan çox isti yemək paylayıb və gündəlik 30 min nəfərə isti qida təmin edib.
Ərdoğan bildirib ki, Türkiyə həm humanitar yardım sahəsində, həm də səhiyyə və strateji istehsal istiqamətlərində milli imkanlarını genişləndirməkdə davam edir. Prezident yeni zavodların ölkənin texnoloji və sənaye potensialını gücləndirəcəyini, səhiyyə sahəsində xaricdən asılılığın azalmasına mühüm töhfə verəcəyini qeyd edib.
Mərasimdə çıxış edən Ərdoğan həmçinin bildirib ki, Türk Qızıl Aypara Cəmiyyəti ötən il 190-dan çox milli cəmiyyətin birləşdiyi beynəlxalq humanitar şəbəkə daxilində ən çox ölkəyə yardım çatdıran təşkilat olub.
Prezident çıxışının sonunda Türk Qızıl Aypara Cəmiyyətinin əməkdaşlarına, könüllülərinə və xeyriyyəçilərə təşəkkürünü ifadə edib, təşkilatın humanitar fəaliyyətlərinin gələcəkdə də davam edəcəyinə əminliyini bildirib.