BAKI,VOA Orxan Qədirzadə

İsrailin Baş naziri Binyamin Netanyahu Qəzzada beynəlxalq sabitləşdirmə qüvvələrinin yerləşdirilməsi ilə bağlı hökumətinin razılıq verdiyi barədə məlumatları təkzib edib.

Netanyahunun ofisindən verilən açıqlamada İsrail siyasi rəhbərliyinin beynəlxalq qüvvələrin Qəzza zolağına daxil olmasına razılıq vermədiyi bildirilib.

Sözügedən plan ABŞ Prezidenti Donald Trampın rəhbərlik etdiyi Sülh Şurasının iyulun 31-də açıqladığı yol xəritəsində yer alıb. Plana əsasən, Qəzzanın idarəçiliyinin beynəlxalq nəzarət altında milli komitəyə verilməsi, ABŞ generalının rəhbərliyi ilə beynəlxalq sabitləşdirmə qüvvələrinin bölgəyə yerləşdirilməsi, İsrail ordusunun mərhələli şəkildə geri çəkilməsi və yenidənqurma işlərinə başlanması nəzərdə tutulur.

Netanyahu isə avqustun 9-da bu razılaşmaları rədd etdiyini açıqlayaraq İsrail qüvvələrinin hər hansı geri çəkilməsindən əvvəl HƏMAS-ın tam şəkildə silahsızlaşdırılmasını tələb edib. Baş nazirin ofisi də Qəzzada yenidənqurmanın yalnız HƏMAS silahlarını tam təhvil verdikdən sonra mümkün olacağını bildirib.

Müharibə nəticəsində Qəzzanın infrastrukturunun böyük hissəsi dağılıb və bölgədə ağır humanitar vəziyyət davam edir.