BAKI,VOA Orxan Qədirzadə

İsrail müdafiə naziri İsrael Katz Türkiyə Prezidenti Rəcəb Tayyib Ərdoğanı Suriyada “təhlükəli macəralara” sürüklənməkdə ittiham edib və Ankara ilə gərginliyin artırılacağı barədə sərt mesaj verib.

Katz Ərdoğana müraciətlə İsrailə qarşı Türkiyə parlamentində “boş və xəyali çıxışlar” etməyə davam etməyin daha yaxşı olduğunu bildirib və İsrailin öz təhlükəsizliyini qorumaq əzmində olduğunu vurğulayıb.

Bu açıqlamalar İsrail ordusunun Türkiyə sərhədinə yaxın Suriyadakı Əbu Zuhur hərbi aerodromuna zərbə endirməsindən sonra səslənib. Suriya xarici işlər naziri Əsəd Şeybani bazada Türkiyə hərbi qüvvələrinin yerləşdirilməsi planının olmadığını, türk rəsmilərinin obyektdə yalnız təlim və hərbi əməkdaşlıq çərçivəsində olduğunu açıqlayıb.

İsrailin Baş naziri Binyamin Netanyahu Türkiyənin Suriyanın cənubuna doğru hərbi möhkəmlənməsinə İsrailin imkan verməyəcəyini deyib.

İsraildə müxalifət isə hökumətin Ankara ilə qarşıdurmanı dərinləşdirməsinə qarşı çıxıb. Demokratlar Partiyasının lideri Yair Qolan və keçmiş baş nazir Ehud Barak Netanyahuya xəbərdarlıq edərək Türkiyə ilə gərginliyin siyasi məqsədlərlə artırılmasının İsrailin təhlükəsizliyinə və ABŞ-la münasibətlərinə zərər verə biləcəyini bildiriblər.