BAKI, AzerVoice, Nailə Babazadə

Türkiyənin laylı hava müdafiə sistemi “Çelik Kubbe”nin gücləndirilməsi məqsədilə yeni raket və hava müdafiə sistemlərinin kütləvi istehsalına dair ümumi dəyəri 6,5 milyard dollar olan müqavilələr imzalanıb.

AzerVoice xəbər verir ki, müqavilələrin imzalanması mərasimi Türkiyə Müdafiə Sənayesi İdarəsinin koordinasiyası ilə 25 noyabrda HAVELSAN-ın ev sahibliyində keçirilib. Tədbirdə Müdafiə Sənayesi İdarəsinin rəhbəri professor Haluk Görgün, idarə rəisinin müavini Hüseyn Avşar, ASELSAN-ın baş direktoru Ahmet Akyol, Roketsan-ın baş direktoru Murat İkinci, Türk Silahlı Qüvvələrinin nümayəndələri və müdafiə sənayesi təmsilçiləri iştirak ediblər.

Mərasimdə imzalanan sənədlər Türkiyənin mövcud hava müdafiə qabiliyyətlərini genişləndirməyi, yeni nəsil raket sistemlərinin istehsalını artırmağı nəzərdə tutur.

Haluk Görgün çıxışında Müdafiə Sənayesi İcra Komitəsinin (SSİK) qəbul etdiyi qərarların mərhələli şəkildə icra olunduğunu bildirib. O, Roketsan və ASELSAN tərəfindən inventara daxil edilmiş yaxın və uzun mənzilli hava müdafiə sistemlərinin daha inkişaf etmiş versiyaları ilə bağlı yeni müqavilələrin də imzalandığını vurğulayıb.

Görgün əlavə edib ki, Türkiyənin müdafiə sənayesi ordunun döyüş qabiliyyətini artırmaq üçün fasiləsiz fəaliyyət göstərir.