BAKI,VOA, Fərid Mikayılov

Türkiyənin müdafiə sənayesi şirkəti ROKETSAN gənc mütəxəssislər üçün nəzərdə tutulan "LEVEL-UP AI/ROKETSAN Süni İntellekt Hackathonu" proqramına qeydiyyatın başladığını elan edib.

VOA xəbər verir ki, süni intellekt texnologiyalarının müdafiə sənayesində tətbiqini genişləndirməyi hədəfləyən proqram 25-27 sentyabr tarixlərində keçiriləcək.

Proqram çərçivəsində Edge AI, maşın öyrənməsi, böyük dil modelləri, avtonom sistemlər və məlumat elmi istiqamətlərində təlimlər, texniki seminarlar, panel müzakirələri və 48 saatlıq hackathon təşkil olunacaq.

Tədbir əsasən kompüter, aviasiya, kosmos, elektrik-elektronika və süni intellekt mühəndisliyi üzrə məzun olmuş, 0-5 il iş təcrübəsinə malik gənc mütəxəssislər və tədqiqatçılar üçün nəzərdə tutulub.

Hackathondan əvvəl iştirakçılar böyük dil modelləri, Agentic AI, kompüter görməsi və avtonom sistemlər üzrə onlayn təlimlər keçəcəklər. Təlimləri uğurla başa vuranlara sertifikat təqdim olunacaq.

Proqramın sonunda komandalar hazırladıqları layihələri münsiflər heyətinə təqdim edəcək və qaliblər "ROKETSAN Süni İntellekt Mükafatı" ilə təltif olunacaqlar. Müsabiqəyə müraciətlər 16 avqust tarixinədək qəbul edilir.