BAKI, AzerVoice, Nailə Babazadə

Almaniyanın kansleri Fridrix Mersin 29 oktyabr axşamı Türkiyəyə səfər edəcəyi və 30 oktyabrda Prezident Rəcəb Tayyib Ərdoğanla görüşəcəyi bildirilib.

AzerVoice xəbər verir ki, Almaniya hökumətinin mətbuat katibinin müavini Sebastyan Hille Berlində keçirilən mətbuat konfransında açıqlayıb ki, Baş nazir Fridrix Mers 29 oktyabrda Türkiyəyə səfər edəcək və ertəsi gün Prezident Ərdoğanla görüşəcək.

Hille qeyd edib ki, görüşlərdə ikitərəfli münasibətlər və xarici siyasətlə yanaşı, iqtisadiyyat, miqrasiya və təhlükəsizlik sahələrində daha sıx əməkdaşlıq məsələləri müzakirə olunacaq.

O, Türkiyənin NATO-nun mühüm üzvü olduğunu vurğulayıb və iki ölkə arasında enerji, ticarət və miqrasiya kimi bir çox ortaq mövzuların mövcud olduğunu bildirib.

Hille əlavə edib ki, Almaniyada yaşayan çoxsaylı türklər və türk mənşəli almanlar sayəsində iki ölkə bir-birinə sıx şəkildə bağlıdır.

“Bu baxımdan Türkiyə təbii olaraq xüsusi əhəmiyyətə malikdir və Avropa İttifaqının ən önəmli qonşularından biridir. Biz həmçinin Aİ-Türkiyə münasibətlərində daha çox irəliləyiş əldə etməyə çalışırıq və hazırda ticarət, miqrasiya və təhlükəsizlik sahələrində yüksək səviyyəli dialoqlar aparırıq.” - deyə o qeyd edib.

Suriyaya deportasiya məsələsində Türkiyənin rolu barədə sualı cavablandıran Hille bildirib ki, bu, Ankara ilə münasibətlər baxımından əhəmiyyətli bir məsələdir, lakin bununla bağlı müzakirələrin nəticələrini gözləmək lazımdır.

O, həmçinin görüşlərdən sonra birgə mətbuat konfransının keçirilməsinin planlaşdırıldığını bildirib.