BAKI, AzerVoice

May ayında qaçqın düşərgələrindən və xarici ölkələrdən Suriyaya qayıdanların sayı əvvəlki ayla müqayisədə 45 faiz artıb.

AzerVoice xəbər verir ki, bu barədə BMT-nin Qaçqınlar üzrə Ali Komissarlığı (UNHCR) məlumat verib.

Komissarlıq bildirib ki, yalnız may ayında qurumda qeydiyyatda olan 15 mindən çox qaçqın geri qayıdıb. Bəşşar Əsəd rejiminin devrilməsindən bəri yeddi ay ərzində ümumilikdə 2 milyon 100 minə yaxın qaçqın və məcburi köçkün öz vətəninə qayıdıb.

Yay aylarında və məktəb tətili dövründə bu artım gözlənilirdi. Lakin genişmiqyaslı dağıntılar səbəbilə hər zərər görmüş bölgələrə axın, Suriya hökuməti qarşısında əlavə çətinliklər yaradıb. Bu bölgələr əsasən ölkədaxili düşərgələrdən və qonşu ölkələrdən qayıdanların yerləşdiyi ərazilərdir.

Komissarlığın məlumatına görə, son yeddi ayda Türkiyə, Livan, İordaniya, İraq və Misirdən 628 minə yaxın qaçqın Suriyaya qayıdıb. Beləliklə, cari ilin əvvəlindən bu yana qayıdanların ümumi sayı 989 min nəfərə çatıb. May ayına qədər İordaniyadan 75 min 500 nəfər, iyun ayında isə Türkiyədən 25 minə yaxın qaçqın vətəninə geri qayıdıb.