BAKI,VOA, Fərid Mikayılov

İran ABŞ-ın ölkənin infrastrukturuna mümkün hərbi zərbələri halında regiondakı strateji obyektləri hədəfə alacağı barədə sərt xəbərdarlıq edib.

VOA xəbər verir ki, bəyanat İranın "Xatəm əl-Ənbiya" Mərkəzi Qərargahının sözçüsü, briqada generalı İbrahim Zülfüqari tərəfindən səsləndirilib.

General Zülfüqari ABŞ Prezidenti Donald Trampın İrana qarşı hərbi təhdidlərini həyata keçirməsi halında Tehranın genişmiqyaslı cavab verəcəyini bildirib.

Onun sözlərinə görə, ABŞ İranın infrastrukturunu hədəfə alarsa, regiondakı mühüm infrastruktur obyektləri İran Silahlı Qüvvələrinin zərbələri ilə məhv ediləcək.

"Əgər Donald Tramp təhdidlərini həyata keçirsə, regiondakı bütün infrastruktur İran İslam Respublikasının qüdrətli silahlı qüvvələrinin polad zərbələri altında darmadağın ediləcək və sanki heç vaxt mövcud olmayıbmış kimi yox olacaq", – deyə Zülfüqari bildirib.

İran rəsmisi eyni zamanda Hörmüz boğazı ilə bağlı da Vaşinqtona xəbərdarlıq edib. O vurğulayıb ki, Tehran ABŞ-ın bu strateji dəniz keçidinə müdaxiləsinə heç bir halda imkan verməyəcək.

"ABŞ kimi regiondan kənar heç bir dövlətin Hörmüz boğazına müdaxiləsinə icazə verməyəcəyik. Bu, İranın keçilməz qırmızı xəttidir", – deyə o əlavə edib.

Bəyanat ABŞ və İran arasında hərbi gərginliyin artdığı, Hörmüz boğazında təhlükəsizlik və qlobal enerji təchizatı ilə bağlı narahatlıqların gücləndiyi bir dövrdə səsləndirilib.