BAKI,VOA,Yusif Şərifzadə

İsrail və Livan nümayəndələri arasında ABŞ vasitəçiliyi ilə keçirilən növbəti birbaşa danışıqlar Romada başlayıb. Görüşlər iki gün davam edəcək.

VOA xəbər verir ki, bu, aprel ayında İran, ABŞ və İsrail arasında atəşkəs elan edilməsindən sonra İsrail və Livan arasında keçirilən altıncı birbaşa danışıqlar raundudur.

Danışıqlarda nümayəndə heyətlərinə İsrailin və Livanın Vaşinqtondakı səfirləri rəhbərlik edir. Görüşlərdə ABŞ-ın Livan və İsraildəki səfirləri də iştirak edir.

İsrail mediasının məlumatına görə, əvvəlki görüşlərdən fərqli olaraq, bu raundda hər iki tərəfdən hərbi nümayəndələr iştirak etməyəcək.

Beyrut danışıqlardan əsasən İsrail qüvvələrinin Livanın cənubundan çıxarılmasına nail olmağı gözləyir. Lakin sürətli irəliləyiş əldə olunacağı ilə bağlı gözləntilər aşağıdır.

Ötən ay Livan və İsrail qüvvələrin geri çəkilməsi və Hizbullahın tərksilah edilməsi məsələlərini əhatə edən “çərçivə razılaşması” elan etmişdi.

Lakin razılaşmanın icrası ilə bağlı proses dayanıb və tərəflər arasında fikir ayrılıqları qalmaqda davam edir.

Hörmüz boğazı ətrafında gərginliyin artmasından əvvəl İsrailin Livana qarşı hərbi əməliyyatları əldə olunan müvəqqəti razılaşmanın pozulması riskini dəfələrlə artırmışdı.