BAKI,VOA Orxan Qədirzadə

“AzerGold” QSC vətəndaşları son vaxtlar şirkətin adından istifadə olunmaqla həyata keçirilən saxta investisiya kampaniyaları və fişinq xarakterli kiberdələduzluq halları ilə bağlı diqqətli olmağa çağırıb.

Şirkətdən bildirilib ki, son dövrlər sosial media platformalarında və müxtəlif internet resurslarında “AzerGold”un adından istifadə edilərək saxta investisiya və reklam kampaniyalarının yenidən aktivləşdiyi müşahidə olunur.

Məlumata görə, bu kampaniyaların əsas məqsədi dövlət şirkətinə olan etibardan sui-istifadə etməklə vətəndaşların maliyyə və şəxsi məlumatlarını ələ keçirmək, eləcə də onların vəsaitlərini mənimsəməkdir.

Qeyd olunub ki, kiberdələduzlar “AzerGold”u guya yüksək gəlir vəd edən investisiya layihələrinin təşkilatçısı kimi təqdim edir, şirkətin korporativ üslubundan, loqosundan və rəhbər şəxslərinin görüntülərindən qanunsuz istifadə edirlər. Bununla yanaşı, rəsmi internet səhifəsini təqlid edən saxta veb-saytlar yaradılır və istifadəçilər həmin keçidlərə yönləndirilir.

Şirkətin məlumatına əsasən, bəzi hallarda vətəndaşlarla xarici ölkələrə məxsus telefon nömrələri və ya müxtəlif mesajlaşma tətbiqləri vasitəsilə əlaqə saxlanılır. Onlardan bank kartı rekvizitləri, şəxsiyyət vəsiqəsi məlumatları, birdəfəlik təsdiq kodları və digər məxfi məlumatlar tələb olunur.

“AzerGold” QSC vurğulayıb ki, şirkət sosial şəbəkələr və digər qeyri-rəsmi platformalar vasitəsilə investisiya cəlb etmir, vətəndaşlardan maliyyə və ya bank məlumatları istəmir və bu cür saxta kampaniyalarla heç bir əlaqəsi yoxdur.

Şirkət vətəndaşlara fəaliyyətinə dair məlumatları yalnız rəsmi informasiya resurslarından və etibarlı mənbələrdən əldə etməyi, şübhəli keçidlərə daxil olmamağı, şəxsi və maliyyə məlumatlarını üçüncü şəxslərlə paylaşmamağı, belə hallarla qarşılaşdıqları təqdirdə isə dərhal hüquq-mühafizə orqanlarına müraciət etməyi tövsiyə edib.