BAKI,VOA,Yusif Şərifzadə

İsrail hökumətinin təhlükəsizlik kabineti işğal olunmuş İordan çayının qərb sahilində 34 yeni yaşayış məntəqəsinin yaradılması üçün 434 milyon dollar büdcə ayırıb.

VOA xəbər verir ki, İsrailin sağçı maliyyə naziri Bezalel Smotriç təhlükəsizlik kabinetinin qərarı barədə məlumat verib və bunu ölkə və məskunlaşma siyasəti üçün “tarixi gün” adlandırıb.

Smotriç bildirib ki, qərar İsrail üçün “bayram günü”dür və Baş nazir Benyamin Netanyahuya dəstəyinə görə təşəkkür edib.

İsrail 1967-ci ildən İordan çayının qərb sahilini işğal altında saxlayır. Hazırda Şərqi Qüds istisna olmaqla, bu ərazidə təxminən üç milyon fələstinlinin arasında 500 mindən çox israilli məskunlaşanın yaşadığı bildirilir.

BMT, Fələstin tərəfi və bir sıra ölkələr işğal olunmuş İordan çayının qərb sahilindəki İsrail yaşayış məntəqələrini beynəlxalq hüquqa əsasən qanunsuz hesab edir.

Yeni qərar İsrail-Fələstin münaqişəsi və bölgədə gərginliyin artdığı bir vaxtda qəbul olunub.

Məskunlaşma siyasəti uzun illərdir beynəlxalq ictimaiyyət tərəfindən mübahisəli məsələ kimi qiymətləndirilir.