BAKI,VOA,Yusif Şərifzadə

İsrail Livanın cənubunda “pilot zonaların” yaradılması ilə bağlı razılaşmanın icrasına başlamağa hazır olduğunu açıqlayıb. Təl-Əviv bu məsələnin Romada keçirilən yeni danışıqlarda irəliləyiş əldə edə biləcəyinə ümid edir.

VOA xəbər verir ki, İsrailin xarici işlər naziri Gideon Saar İtaliyada keçirilən danışıqlar zamanı İsrailin bu iki “pilot zona”nın yaradılması prosesində irəliləməyə hazır olduğunu bildirib.

Saar qeyd edib ki, Romadakı müzakirələrin bu istiqamətdə nəticə verəcəyinə ümid edir.

İsrail ordusu ötən ay əldə olunmuş çərçivə razılaşmasına baxmayaraq, Livanın cənubunda zərbələr endirməyə və kəndləri dağıtmağa davam edib.

Razılaşmaya əsasən, İsrail Hizbullahla mübarizə məqsədilə yerləşdirdiyi qüvvələri Livanın cənubundakı ərazilərdən mərhələli şəkildə çıxarmalıdır.

Sənədə görə, Hizbullah qüvvələrinin geri çəkilməsindən sonra Livan ordusu “pilot zona” adlandırılan iki kiçik ərazidə tam nəzarəti ələ almalıdır.

Danışıqlar Livanın cənubunda təhlükəsizlik vəziyyətinin sabitləşdirilməsi və tərəflər arasında əldə olunan razılaşmanın icrası məqsədi daşıyır.