BAKI,VOA,Yusif Şərifzadə

İsrail və Livan nümayəndələri arasında Romada keçirilən danışıqların ilk günü başa çatıb. Görüşlər iki ölkə arasında əldə olunan çərçivə razılaşmasının icrası məsələlərinə həsr olunub.

VOA xəbər verir ki, İsrail və Livan arasında ABŞ vasitəçiliyi ilə keçirilən danışıqların ilk mərhələsi başa çatıb.

Məlumata görə, görüşlər zamanı Livanın cənubundakı vəziyyət və İsrail qüvvələrinin həmin ərazilərdən çıxarılması ilə bağlı razılaşmanın həyata keçirilməsi müzakirə olunub.

Daha əvvəl İsrailin xarici işlər naziri ölkəsinin ABŞ vasitəçiliyi ilə əldə olunan razılaşma çərçivəsində Livanın cənubundakı iki ərazidən qoşunların çıxarılması planlarını həyata keçirməyə hazır olduğunu bildirib.

Danışıqların əsas məqsədi tərəflər arasında əldə olunan çərçivə razılaşmasının praktiki icrası yollarını müəyyənləşdirməkdir.

Görüşlərin ikinci gün də davam edəcəyi gözlənilir.

İsrail və Livan arasında əldə olunan razılaşma çərçivəsində İsrail qüvvələrinin mərhələli şəkildə geri çəkilməsi, Hizbullahın mövqelərindən uzaqlaşdırılması və Livan ordusunun həmin ərazilərdə nəzarəti gücləndirməsi nəzərdə tutulur.