BAKI,VOA, Fərid Mikayılov

Bəhreyn Silahlı Qüvvələri ölkənin hava hücumundan müdafiə sistemlərinin İran tərəfindən həyata keçirildiyi bildirilən çoxsaylı hava hücumlarının qarşısını aldığını və onları zərərsizləşdirdiyini açıqlayıb.

VOA xəbər verir ki, Bəhreyn Silahlı Qüvvələrinin Baş Komandanlığının yaydığı bəyanatda İranın ölkədəki mülki əhalini hədəf alan hücumlarla "aqressiv siyasətini davam etdirdiyi" iddia olunub.

Məlumata görə, hava hücumundan müdafiə sistemləri yüksək döyüş hazırlığı şəraitində fəaliyyət göstərərək İran tərəfindən buraxıldığı bildirilən raket və pilotsuz uçuş aparatlarını vaxtında aşkarlayıb və məhv edib.

Rəsmi açıqlamada vurğulanıb ki, ölkənin bütün hərbi hissələri və təhlükəsizlik qüvvələri Bəhreynin müdafiəsini təmin etmək məqsədilə ən yüksək hazırlıq və döyüş növbətçiliyi rejiminə keçirilib.

Bəhreyn hakimiyyəti əhaliyə müraciət edərək onları ehtiyatlı olmağa, hücumlardan sonra aşkar edilə biləcək şübhəli əşyalara yaxınlaşmamağa və bu barədə dərhal aidiyyəti dövlət qurumlarına məlumat verməyə çağırıb.

Bildirilib ki, hərbi mühəndis bölmələri belə obyektlərin təhlükəsiz şəkildə zərərsizləşdirilməsi üçün tam hazırlıq vəziyyətindədir.

Bəyanatda həmçinin İranın raket və pilotsuz uçuş aparatları vasitəsilə mülki şəxsləri və şəxsi mülkiyyəti hədəfə aldığı iddia edilərək bunun beynəlxalq humanitar hüququn açıq şəkildə pozulması olduğu vurğulanıb.