BAKI,VOA, Fərid Mikayılov

Amerika Birləşmiş Ştatlarının paytaxtında ABŞ və Özbəkistanın İşgüzar və İnvestisiya Şurasının növbəti iclası baş tutub.

VOA xəbər verir ki, iki ölkənin sahibkarları arasında birbaşa əlaqələrin qurulması və iqtisadi tərəfdaşlığın dərinləşdirilməsi məqsədilə yaradılan bu platforma çərçivəsində mühüm qərarlar qəbul edilib.

Tədbirdə hər iki ölkənin dövlət və hökumət rəsmiləri təmsil olunub. İclasa Özbəkistan tərəfindən Prezident Administrasiyasının məsul şəxsi Saida Mirziyoyeva, ABŞ tərəfindən isə Ağ Evin Cənubi və Mərkəzi Asiya üzrə xüsusi nümayəndəsi Serjio Qor qatılıb.

Tərəflər birgə işgüzar təşəbbüslərin həyata keçirilməsi üçün möhkəm institusional bazanın yaradılması məsələlərini müzakirə ediblər.

Görüşün yekununda əməkdaşlığın əsas prioritetlərini müəyyən edən qarşılıqlı anlaşma memorandumu imzalanıb. Bildirilib ki, Şuranın fəaliyyəti Özbəkistan və ABŞ prezidentləri arasındakı yüksək səviyyəli etimadın və siyasi iradənin nəticəsidir.

Səfir Serjio Qor öz çıxışında ABŞ-ın son bir il ərzində Mərkəzi Asiyada strateji tərəfdaşlığı möhkəmləndirmək istiqamətində əhəmiyyətli addımlar atdığını və Özbəkistanın bu prosesdə kilit rol oynadığını vurğulayıb.

Şuranın əsas hədəfləri sırasına Amerika texnologiyalarının Özbəkistan iqtisadiyyatına cəlb edilməsi, kənd təsərrüfatı, energetika və logistika sahələrində birgə layihələrin dəstəklənməsi daxildir. Bu platforma həm də hər iki ölkənin kiçik və orta biznes subyektləri üçün yeni qlobal imkanlar vəd edir.