BAKI,VOA,Yusif Şərifzadə

ABŞ-ın Beyrutdakı səfirliyi Yaxın Şərqdə artan gərginlik fonunda Amerika vətəndaşlarını Livana səfər etməməyə, həmçinin regiona və ya region üzərindən səyahət planlarını yenidən nəzərdən keçirməyə çağırıb.

VOA xəbər verir ki, səfirliyin yaydığı təhlükəsizlik bildirişində qeyd olunub ki, Yaxın Şərqdə yüksək gərginlik səbəbindən təhlükəsizlik mühiti mürəkkəb olaraq qalır və vəziyyət gözlənilmədən daha da pisləşə bilər. ABŞ vətəndaşlarına ehtiyatlı davranmaq və rəsmi qurumların tövsiyələrinə əməl etmək tövsiyə edilib.

ABŞ-ın Qüdsdəki səfirliyi də oxşar xəbərdarlıq yayıb. Bildirişdə Amerika vətəndaşlarına Qəzza zolağına, İsrailin şimal bölgələrinə və Misirlə sərhəd ərazilərinə, Taba sərhəd-keçid məntəqəsi istisna olmaqla, səfər etməmələri tövsiyə olunub.

Rəsmi Vaşinqton bildirib ki, bölgədə hərbi əməliyyatların genişlənməsi ehtimalı qalmaqdadır və təhlükəsizlik şəraiti qısa müddətdə dəyişə bilər. Buna görə də ABŞ vətəndaşlarına səfərlərdən əvvəl ən son təhlükəsizlik məlumatlarını diqqətlə izləmələri tövsiyə edilir.

Son günlər Yaxın Şərqdə artan hərbi gərginlik, raket və pilotsuz uçuş aparatları ilə hücumlar bir sıra ölkələrin təhlükəsizlik xəbərdarlıqlarını sərtləşdirməsinə səbəb olub.