BAKI,VOA, Nailə Babazadə

Fransa Prezidenti Emmanuel Makron şənbə günü Səudiyyə Ərəbistanının vəliəhd şahzadəsi Məhəmməd bin Salman ilə telefon əlaqəsi saxlayaraq, İslamabadda davam edən İran-ABŞ sülh danışıqlarını müzakirə etdiyini açıqlayıb. Liderlər bölgədəki vəziyyətlə bağlı sıx təmasda qalmaq barədə razılığa gəliblər.

VOA xəbər verir ki,"X" sosial platformasındakı paylaşımında Makron atəşkəsə verdiyi dəstəyi yenidən ifadə edib. Fransa lideri vurğulayıb ki, hazırkı atəşkəsə tam əməl olunmalı və bu proses gecikmədən Livanı da əhalə etməlidir. Makron, həmçinin regiondakı humanitar və iqtisadi sabitlik üçün Livanın təhlükəsizliyinin vacibliyini qeyd edib.

Görüş zamanı müzakirə olunan digər kritik mövzu Hörmüz boğazındakı blokada olub. Makron və Məhəmməd bin Salman boğazda tam azad və təhlükəsiz naviqasiyanın ən qısa zamanda bərpa edilməsinin zəruriliyini vurğulayıblar. Qeyd edək ki, Hörmüz boğazındakı gərginlik qlobal enerji bazarlarına ciddi təsir göstərməkdədir.

İslamabadda danışıqların başladığı bir vaxtda, hər iki lider gərginliyin azaldılmasına və bölgədə davamlı sülhün təmin edilməsi üçün sazişin imzalanmasına töhfə vermək məqsədilə koordinasiyalı şəkildə fəaliyyət göstərməyə qərar veriblər.

Eyni zamanda, Səudiyyə Ərəbistanı Müdafiə Nazirliyi Pakistan hərbi qüvvələrinin Krallıqdakı Kral Əbdüləziz Hava Bazasına çatdığını təsdiqləyib ki, bu da İslamabaddakı diplomatik masa ilə yanaşı, sahədəki hərbi alyansların da gücləndiyini göstərir.