BAKI,VOA

Pakistanın Baş naziri Şahbaz Şərif ABŞ və İran arasında davam edən gərginliyin azaldılması üçün həyata keçirilən vasitəçilik səylərinin kritik həddə çatdığını elan edib. Baş nazir tərəflərin hərbi ritorikanı diplomatik dialoqla əvəz etməyə hazır olduqlarını və bu istiqamətdə güclü siyasi iradə nümayiş etdirdiklərini bildirib.

VOA xəbər verir ki, Şahbaz Şərif rəsmi açıqlamasında hər iki tərəfin danışıqlara tam hazır olduğunu vurğulayıb: "Sabah, şənbə günü həm ABŞ, həm də İran nümayəndə heyətləri Pakistanda olacaqlar. Biz bu tarixi görüşün uğurla nəticələnməsi və ixtilafların müzakirə yolu ilə həll edilməsi üçün əlimizdən gələn hər şeyi edəcəyik".

Baş nazir hazırkı məqsədin yalnız müvəqqəti sakitlik deyil, müharibənin tamamilə dayandırılması olduğunu qeyd edib. "Atəşkəs artıq elan edilib. İndi hədəfimiz daha irəli bir addım ataraq, müharibənin danışıqlar masasında birdəfəlik başa çatmasına nail olmaqdır", — deyə o əlavə edib.

Siyasi analitiklər Şahbaz Şərifin bu açıqlamasını İslamabadın hər iki tərəflə qurduğu balanslı münasibətlərin uğuru kimi qiymətləndirirlər. Pakistanın vasitəçiliyi ilə keçiriləcək bu "diplomatik marafon"un regionda və dünyada gərginliyi azaldacaq həlledici siqnal olacağı gözlənilir.