BAKI,VOA, Nailə Babazadə

Almaniya hökumətindəki mənbələrin "Reuters" agentliyinə verdiyi məlumata görə, çərşənbə günü günorta saatlarında Almaniya Kansleri Fridrix Mers və ABŞ Prezidenti Donald Tramp arasında telefon danışığı baş tutub. Danışıq ABŞ-ın İranla əldə etdiyi atəşkəs razılaşmasından qısa müddət sonraya təsadüf edib.

VOA xəbər verir ki, Almaniyanın "Bild" qəzetinin ilk olaraq yaydığı məlumata əsasən, liderlər arasındakı söhbət qısa və səmimi xarakter daşıyıb. Kansler Mersin əsas məqsədinin qlobal diplomatik proseslərin hazırkı vəziyyəti barədə ümumi məlumat almaq və Vaşinqtonun regional planları ilə tanış olmaq olduğu bildirilir.

Xüsusilə diqqət çəkən məqamlardan biri odur ki, tərəflər Almaniyanın Hörmüz boğazının təhlükəsizliyinin təmin edilməsində mümkün iştirakı məsələsinə toxunmayıblar. "Bild" qəzeti qeyd edir ki, bu həssas mövzu danışıqların gündəmində yer almayıb. Bu təmas, xüsusilə regional gərginliyin azaldılması istiqamətində atılan beynəlxalq addımların fonunda iki müttəfiq ölkə arasındakı koordinasiyanın göstəricisi kimi qiymətləndirilir.