BAKI, VOA, Nailə Babazadə

İndoneziya Prezidentinin sözçüsü Prasetyo Hadi Yaxın Şərqdə artan hərbi gərginlik fonunda Qəzzaya əsgər yerləşdirmə planının dondurulduğunu açıqlayıb.

VOA xəbər verir ki, "Antara" agentliyinin məlumatına görə, paytaxt Cakartada jurnalistlərə açıqlama verən Hadi hazırda hər şeyin gözləmə mövqeyində olduğunu və qərarın təxirə salınmasına əsas səbəb kimi bölgədəki hərbi eskalasiyanı göstərib.

İndoneziya daha əvvəl ABŞ Prezidenti Donald Trampın Qəzza planı çərçivəsində yaradılan Beynəlxalq Sabitlik Qüvvələrinə (ISF) təxminən 8 min hərbçi ilə töhfə verəcəyini və bu qüvvələrin iyunun sonuna qədər hazır olacağını bəyan etmişdi. Xatırladaq ki, 23 sentyabr 2025-ci ildə Türkiyə Prezidenti Rəcəb Tayyib Ərdoğan da daxil olmaqla 8 müsəlman liderin Donald Trampla görüşündən sonra Qəzza üçün Sülh Planı açıqlanmışdı.

Bu planın tərkib hissəsi kimi 13 oktyabr 2025-ci ildə Türkiyə, ABŞ, Qətər və Misir tərəfindən imzalanan birgə bəyanatla atəşkəs elan edilmiş, noyabrda isə BMT Təhlükəsizlik Şurasının 2803 saylı qətnaməsi ilə plan rəsmən qəbul olunmuşdu. Yanvarın 22-də Davosda Türkiyənin xarici işlər naziri Hakan Fidan tərəfindən imzalanan Sülh Şurası Nizamnaməsi ilə proses yeni mərhələyə qədəm qoymuşdu. Lakin fevralın 28-dən bəri ABŞ-İsrail və İran arasında başlayan birbaşa hərbi toqquşmalar beynəlxalq sülhməramlı qüvvələrin Qəzzaya yerləşdirilməsi prosesinə ciddi maneə törədib.