BAKI, VOA, Nailə Babazadə

ABŞ Mərkəzi Komandanlığı (CENTCOM) cümə axşamı verdiyi bəyanatda İrana qarşı hərbi əməliyyatlarda iştirak edən Amerika yanacaqdoldurma təyyarəsinin İraq ərazisində qəzaya uğradığını bildirib.

VOA xəbər verir ki, məlumata görə, qəzadan dərhal sonra ərazidə xilasetmə işlərinə başlanılıb. "The Associated Press" agentliyinə anonimlik şərti ilə məlumat verən ABŞ rəsmisi qəzaya uğrayan "KC-135" tipli təyyarənin göyərtəsində ən azı beş heyət üzvünün olduğunu qeyd edib. Hazırda heyət üzvləri arasında tələfatın olub-olmadığı barədə dəqiq məlumat verilmir.

Hərbi mənbələr təyyarənin itirildiyini təsdiqləsələr də, qəzanın düşmən atəşi və ya "dost atəşi" nəticəsində baş vermədiyini xüsusi vurğulayıblar. Hadisə zamanı havada iki təyyarənin olduğu, onlardan birinin təhlükəsiz şəkildə yerə endiyi, digərinin isə İraqın qərbində qəzaya uğradığı bildirilir. Qəzaya uğrayan hər iki təyyarənin "KC-135" tankeri olduğu dəqiqləşdirilib. CENTCOM vəziyyətin inkişafı ilə bağlı əlavə məlumatların veriləcəyini və hərbçilərin ailələrinə dəqiq məlumat çatdırmaq üçün bir qədər səbirli olmağın vacibliyini qeyd edib.

Bu hadisə ABŞ-ın İrana qarşı hərbi əməliyyatları çərçivəsində rəsmən etiraf edilən dördüncü təyyarə itkisidir. Ötən həftə Küveyt qüvvələrinin səhvən açdığı atəş nəticəsində ABŞ-ın üç "F-15E Strike Eagle" qırıcısı vurulmuş, lakin bütün altı heyət üzvü katapult edərək sağ qalmışdı. Pentaqonun son hesabatına görə, İranla müharibənin başlanğıcından bəri 7 Amerika hərbçisi döyüşlərdə həlak olub, 140-a yaxın hərbçi isə yaralanıb. Prezident Donald Tramp və Müdafiə naziri Pit Heqset müharibə bitənə qədər daha çox Amerika əsgərinin həyatını itirə biləcəyi barədə xəbərdarlıq ediblər.