BAKI,VOA, Fərid Mikayılov

Amerika Birləşmiş Ştatlarının Dövlət Katibi Marko Rubio jurnalistlərə verdiyi son bəyanatında Yaxın Şərq regionunda artan gərginliyə toxunaraq, İran rəhbərliyini kəskin tənqid edib.

VOA xəbər verir ki, Rubio bildirib ki, Yəməndəki husi milislərinin Qırmızı dənizlə Ədən körfəzini birləşdirən strateji Bab əl-Məndəb boğazında ticarət gəmilərinə hücum etmək təhdidləri fonunda ABŞ Səudiyyə Ərəbistanı rəsmiləri ilə intensiv təmasdadır.

Rubio xəbərdarlıq edərək vurğulayıb: "Keçən həftə ərzində bu təhdidlə bağlı Səudiyyə tərəfi ilə bir neçə dəfə müzakirələr aparmışıq. Bu, yeni bir təhlükə olmasa da, son dövrlər yenidən özünü büruzə verməyə başlayıb. Məsələnin nüvəsində duran əsas məqam odur ki, İran bu proseslərin tam mərkəzində yer alır. Regionda sabitliyi bozan və ixtişaş yaradan əsas tərəf məhz İrandır".

ABŞ Dövlət Katibi Tehranın Yaxın Şərqdəki proksi qüvvələri maliyyələşdirməsini diqqətə çatdıraraq bildirib ki, İran rəhbərliyi ölkənin maliyyə resurslarını öz xalqının rifahına deyil, regional sabitliyi pozan qruplaşmalara ayırır: "Husilər, Hizbullah, İraqdakı silahlı milislər və HƏMAS — İran öz pulunu öz vətəndaşlarına deyil, məhz bu kimi terror təşkilatlarına və regionu qeyri-sabitləşdirən qüvvələrə xərcləyir".