BAKI,VOA Orxan Qədirzadə
Bəhreyn Daxili İşlər Nazirliyi ölkədə hava həyəcanı siqnallarının yenidən işə düşdüyünü bildirərək əhalini təhlükəsiz sığınacaqlara keçməyə çağırıb.
Nazirliyin yaydığı açıqlamada vətəndaşlar və ölkə sakinlərindən sakitliyi qorumaq, ən yaxın təhlükəsiz yerə sığınmaq xahiş olunub.
Bəyanata əsasən, gün ərzində artıq ikinci dəfə hava həyəcanı siqnalları səsləndirilib. Bundan əvvəl də İranın hücumları fonunda oxşar xəbərdarlıq edilmişdi.
ABŞ Silahlı Qüvvələrinin Mərkəzi Komandanlığı (CENTCOM) daha əvvəl Hörmüz boğazında kommersiya gəmilərinə qarşı hücumlara cavab olaraq İran ərazisində bir sıra hədəflərə zərbələr endirdiyini açıqlamışdı.
İranın Fars agentliyi isə İran İslam İnqilabı Keşikçiləri Korpusunun ABŞ-ın İranın cənubuna endirdiyi hava zərbələrinə cavab olaraq Bəhreyn və Küveytdə yerləşən ABŞ-a məxsus 85 hərbi obyektə raket və pilotsuz uçuş aparatları ilə hücum həyata keçirdiyini bildirib.