BAKI,VOA Orxan Qədirzadə

İran ABŞ-ın ölkənin cənubuna endirdiyi zərbələrə cavab olaraq Bəhreyn və Küveytdə yerləşən ABŞ-a məxsus 85 hərbi obyektə raket və pilotsuz uçuş aparatları ilə zərbələr endirdiyini bəyan edib.

Bu barədə İran İslam İnqilabı Keşikçiləri Korpusu məlumat yayıb.

Bəyanatda bildirilib ki, ABŞ gecə saatlarında Hörmüzqan və Məhşəhr sahillərində yerləşən bəzi hərbi bazalara və mülki obyektlərə hava zərbələri endirməklə atəşkəsi və tərəflər arasında əldə olunmuş razılaşmanı pozub.

İnqilab Keşikçiləri Korpusu cavab əməliyyatı çərçivəsində Hərbi Dəniz Qüvvələri və Aerokosmik Qüvvələrin birgə həyata keçirdiyi raket və pilotsuz uçuş aparatları hücumları nəticəsində Bəhreyndə yerləşən Salman limanı, ABŞ Hərbi Dəniz Qüvvələrinin Beşinci Donanmasının qərargahı, eləcə də Küveytdəki Əli əl-Salem aviabazası da daxil olmaqla 85 ABŞ hərbi obyektinin hədəfə alındığını bildirib.

Məlumatda həmçinin ABŞ-a məxsus MQ-9 tipli bir pilotsuz uçuş aparatının vurulduğu iddia edilib.

Bundan əvvəl ABŞ Mərkəzi Komandanlığı (CENTCOM) İranın Hörmüz boğazından keçən üç ticarət gəmisinə hücum etdiyini əsas gətirərək İran ərazisində yerləşən 80-dən çox hərbi hədəfə zərbələr endirdiyini açıqlamışdı.

Bu arada İran parlamentinin sədri Məhəmməd Baqir Qalibaf ABŞ-ı əldə olunmuş razılaşmaları pozmaqda ittiham edib. O bildirib ki, Vaşinqton Hörmüz boğazı ilə bağlı razılaşmalara əməl etməyib, İrana qarşı yeni hücum təhdidlərini davam etdirib, neft sanksiyalarını yenidən tətbiq edib və ölkənin cənubuna hücumlar təşkil edib.

Qalibaf vurğulayıb ki, İran bu addımlara səssiz qalmayacaq və "təzyiq və şantaj dövrünün başa çatdığını, ölkəsinin geri çəkilməyəcəyini" bəyan edib.