BAKI,VOA, Nailə Babazadə

İranın paytaxtı Tehranda hava hücumundan müdafiə sistemlərinin fəaliyyətə keçdiyi və şəhərin müxtəlif hissələrində güclü partlayış səslərinin eşidildiyi bildirilir.

VOA xəbər verir ki, İranın yarı-rəsmi "Tesnim" xəbər agentliyinin məlumatına görə, müdafiə sistemləri hava hədəflərini zərərsizləşdirmək üçün dövriyyəyə girib.

Xatırladaq ki, fevralın 28-dən etibarən İsrail və ABŞ koalisiyası İrana qarşı genişmiqyaslı hərbi əməliyyatlara başlayıb. Bu hücumlar rəsmi Tehran və Vaşinqton arasında diplomatik danışıqların davam etdiyi bir vaxtda baş verib. İran tərəfi isə buna cavab olaraq Qətər, BƏƏ və Bəhreyn kimi ölkələrdə yerləşən ABŞ hərbi bazalarını hədəf alıb.

ABŞ və İsrailin hava zərbələri nəticəsində İranın ali lideri Ayətullah Əli Xameneyi ilə yanaşı, bir çox yüksək rütbəli dövlət rəsmiləri həlak olub. İran Səhiyyə Nazirliyinin sözçüsü Hüseyn Kermanpurun son açıqlamasına görə, hücumlar başlayandan bəri ölənlərin sayı 926 nəfərə çatıb.

Hazırda Tehrandakı son partlayışların vurduğu ziyan və hədəf alınan nöqtələr barədə dəqiq məlumatlar araşdırılır.