BAKI,VOA, Fərid Mikayılov

İran Xarici İşlər Nazirliyinin sözçüsü İsmayıl Bəqai ABŞ-nin son hərbi zərbələrini sərt tənqid edərək, bu hücumların İran xalqını daha da birləşdirdiyini bildirib.

VOA xəbər verir ki, Bəqai X sosial şəbəkəsində paylaşdığı açıqlamada ABŞ-nin Hörmüzqan vilayətinə endirdiyi zərbələr nəticəsində həlak olan səkkiz nəfərin fotolarını paylaşaraq, Vaşinqtonu mülki infrastrukturu hədəfə almaqda ittiham edib.

"ABŞ özünün guya 'gücünü' mülki infrastruktura hücum etməklə və günahsız insanları öldürməklə nümayiş etdirməyə çalışır", – deyə o qeyd edib.

Nazirin sözlərinə görə, ABŞ ötən gecə Hörmüzqan vilayətində körpüləri hədəf alaraq daha bir "açıq hərbi cinayət" törədib.

"Bu hücum nəticəsində dörd kişi və dörd qadın olmaqla səkkiz günahsız iranlı, o cümlədən iki əlil qardaş həyatını itirib", – deyə Bəqai bildirib.

O vurğulayıb ki, baş verənlər İran xalqının iradəsini sarsıtmayıb.

"İran xalqı bu gün hər zamankından daha qətiyyətli və daha birlik içindədir. Xalqımız sevimli vətəninə qarşı törədilən bu cinayətkar təcavüzə görə düşmənlərini peşman etməyə tam qərarlıdır", – deyə XİN sözçüsü əlavə edib.