BAKI,VOA,Yusif Şərifzadə

Fransa Tehrandakı səfirliyinin əməkdaşları ilə bağlı insidentdən sonra İranın müvəqqəti işlər vəkilini Xarici İşlər Nazirliyinə çağırıb. Paris hadisəni diplomatik normaların pozulması kimi qiymətləndirib.

VOA xəbər verir ki, Fransanın Xarici İşlər Nazirliyi bildirib ki, İranın müvəqqəti işlər vəkilinə Tehranda Fransa səfirliyinin əməkdaşlarının saxlanılması və fiziki təzyiqə məruz qalması ilə bağlı ölkənin “ən sərt qınağı” çatdırılıb.

Fransa Xarici İşlər Nazirliyinin açıqlamasında hadisənin əvvəlcədən planlaşdırılmış və məqsədli xarakter daşıdığı bildirilib. Paris bunu beynəlxalq hüququn və İranın da tərəf olduğu Vyana Konvensiyalarının açıq şəkildə pozulması kimi qiymətləndirib.

Açıqlamada qeyd olunub ki, Vyana Konvensiyaları diplomatik nümayəndələrin təhlükəsizliyini təmin edir və dövlətlərarası münasibətlərin əsas prinsiplərindən biridir.

Fransa İran hakimiyyətindən insidentin tam araşdırılmasını, məsul şəxslərin cəzalandırılmasını və diplomatik obyektlərin, eləcə də əməkdaşların təhlükəsizliyinin beynəlxalq öhdəliklərə uyğun təmin edilməsini tələb edib.

İki ölkə arasında münasibətlər son dövrdə regional gərginlik və diplomatik narazılıqlar fonunda daha da mürəkkəbləşib.