BAKI, AzerVoice, Nailə Babazadə
ABŞ Prezidenti Donald Tramp, Rusiya Prezidenti Vladimir Putinlə apardığı telefon danışığında nüvə silahları mövzusunun gündəmə gəldiyini bildirib.
AzerVoice xəbər verir ki, Ağ Evdə açıqlama verən Tramp deyib ki, Putin söhbət zamanı nüvə gərginliyinin azaldılması barədə danışıb.
“Prezident Putin telefon danışığında mənə nüvə silahları ilə bağlı gərginliyin azaldılmasından bəhs etdi. Mənim üçün bu, problem deyil. Əksinə, bunun yaxşı və uyğun bir addım olduğunu düşünürəm,” – deyə Tramp bildirib.
Tramp, ABŞ-ın dünyada ən çox nüvə silahına sahib ölkə, Rusiyanın ikinci, Çinin isə üçüncü sırada olduğunu qeyd edib və nüvə silahsızlanma mövzusunda danışıqlara açıq olduğunu vurğulayıb.
NATO Baş katibi Mark Rutte isə Trampın Putin üzərində təsir gücünə malik olduğunu və onu müharibəni dayandırmağa inandıra biləcəyinə inandığını deyib.
Rutte həmçinin, NATO-nun Ukraynaya dəstəyinin davam edəcəyini vurğulayıb.