BAKI, AzerVoice, Nailə Babazadə

Rusiya, Ukrayna ilə davam edən müharibədə diplomatik həll yollarına üstünlük verdiyini bəyan etsə də, hava məkanında atəşkəslə bağlı heç bir razılaşmanın əldə olunmadığını açıqlayıb.

AzerVoice xəbər verir ki, AFP-nin yaydığı məlumata görə, Kremlin sözçüsü Dmitri Peskov Fransız xəbər agentliyinin sualını cavablandırarkən bildirib ki, “Rusiya Silahlı Qüvvələri üzərlərinə düşən vəzifələri yerinə yetirirlər və hərbi obyektlərə, eləcə də onlara yaxın infrastruktura hücumları davam etdirirlər.”

Peskov eyni zamanda qeyd edib ki, Rusiya siyasi və diplomatik yollarla məqsədlərinə çatmaq üçün danışıqlar prosesində iştirakda maraqlıdır.

Rusiya dövlət xəbər agentliyi TASS-ın məlumatına görə, Peskov əlavə olaraq vurğulayıb ki, Ukrayna ilə hava məkanında atəşkəs məsələsində hər hansı razılıq əldə olunmayıb.

Xatırladaq ki, bundan əvvəl Belarus Prezidenti Aleksandr Lukaşenko Ukraynadakı münaqişənin həlli prosesinin hava məkanında atəşkəsin təmin olunması ilə başlaya biləcəyini təklif etmişdi.

Qeyd edək ki, bu açıqlamalar Kiyevə edilən böyükmiqyaslı gecə hücumundan sonra verilib. Hücum nəticəsində çox sayda ölən və yaralananların olduğu bildirilir.