BAKI,VOA,Yusif Şərifzadə

Məqalə müəllifi Məhəmməd Mənsur İsrailin Baş naziri Benyamin Netanyahunun ABŞ tərəfindən hazırlanan Qəzza planını rədd etməsinin bölgədəki kövrək sülh prosesini təhlükə altına atdığını və uzunmüddətli müharibə riskini artırdığını yazıb.

VOA xəbər verir ki, müəllifin fikrincə, Netanyahunun Vaşinqtonun Qəzza ilə bağlı yol xəritəsinə qarşı mövqeyi iki milyondan çox fələstinlinin üzləşdiyi humanitar böhranın davam etməsi ilə bağlı narahatlıqları artırıb.

Məqalədə qeyd olunur ki, 15 maddədən ibarət plan HƏMAS-ın silahsızlaşdırılması müqabilində İsrail qüvvələrinin mərhələli şəkildə geri çəkilməsini və idarəetmənin beynəlxalq təhlükəsizlik qüvvələrinin dəstəklədiyi texniki Fələstin komitəsinə verilməsini nəzərdə tutur.

Müəllif bildirib ki, Donald Tramp Qəzza planını açıqladıqdan sonra İsrail atəşkəs razılaşmasına baxmayaraq, demək olar ki, gündəlik hücumlarını davam etdirib.

Məqalədə iddia olunur ki, İsrail qoşunlarını geri çəkmək əvəzinə hazırda Qəzza zolağının 70 faizindən çoxuna hərbi nəzarəti saxlayır.

Mənsurun yazdığına görə, İsraildə mühüm seçkilərə bir neçə həftə qalmış Netanyahu diplomatik prosesi faktiki olaraq dayandırıb və İsrail qüvvələrinin HƏMAS tam şəkildə tərksilah edilməyənədək geri çəkilməyəcəyini bildirib.

Müəllif hesab edir ki, bu mövqe ABŞ vasitəçiliyi ilə əldə edilən atəşkəs prosesini tamamilə iflasa uğrama təhlükəsi ilə üz-üzə qoyur.