BAKI,VOA, Fərid Mikayılov

İran xarici işlər nazirinin müavini Məcid Taxt Rəvançi rəsmi Tehran və Vaşinqton arasında əldə olunmuş irəliləyişlərlə bağlı mühüm bəyanat verib. Nazir müavini bildirib ki, İran ilə ABŞ arasında əldə olunmuş yeni tarixi anlaşmanın rəsmi imzalama mərasimində İran Parlamenti (Məclis) və Danışıqlar Heyətinin Sədri Məhəmməd Baqir Qalibaf və ABŞ Vitse-prezidenti Cey di Vens şəxsən iştirak edəcəklər.

VOA, xəbər verir ki, Rəvançi bu açıqlamanı Xarici İşlər Naziri Abbas Əraqçinin xarici ölkələrin səfirləri və diplomatik nümayəndələri ilə keçirdiyi geniş tərkibli görüşdən sonra jurnalistlərin suallarını cavablandırarkən verib.

Nazir müavini Livan da daxil olmaqla bütün regional cəbhələrdə hərbi əməliyyatların tamamilə başa çatdığını elan edib. O vurğulayıb ki, Hörmüz boğazının gəmilərin hərəkəti üçün yenidən açılması, dəniz blokadasının tamamilə ləğv edilməsi və İranın xarici banklarda dondurulmuş maliyyə aktivlərinin sərbəst buraxılması məsələləri imzalanacaq anlaşma memorandumunun əsas bəndlərini təşkil edir.

Məcid Taxt Rəvançi imzalama mərasiminin İsveçrədə keçiriləcəyini, lakin dəqiq ünvanın hələlik tam dəqiqləşmədiyini qeyd edib. O, həmçinin əlavə edib ki, bu memorandum rəsmiləşdikdən dərhal sonra tərəflər arasında nüvə proqramına dair genişmiqyaslı müzakirələrin növbəti mərhələsinə start veriləcək.